Komo parte kan hiro-protedta antes an ika-apat na State of the Nation Address (SONA) ni Presidente Ferdinand Marcos Jr, sinulo kan mga miyembro kan Bagong Alyansang Makabayan (Bayan) Southern Tagalog an duwang effigy na pig-apod nindang “ZomBBM” asin “Sara-nanggal” kasuodma, Lunes, Hulyo 28, 2025.
Sigun sa grupo, nagsisimbolo soboot an mga effigy sa “mga halimaw kan lipunan” na nagpapasakit sa taumbayan.
An “ZomBBM”, tataraman gikan sa “zombie” asin “BBM” ( Bongbong Marcos), an pigladawan si Marcos komo sunud-sunuran sa Estados Unidos, partikularmente na ki U.S. President Donald Trump, na ipigbugtak sa likod kan effigy.
Mientrastanto, an “Sara-nanggal” , na gikan sa pangaran ni Vice President Sara Duterte asin sa nilalang na “manananggal” an igwang suhay na pang-itaas asin pang-ibabang lawas, kun saen naglilitaw an dakulang kantidad kan kwarta gikan sa ibabang parte.
Marurumdumang na-impeach si Duterte kan Kamara kan nakalihis na Pebrero 5 huli soboot sa mga kwestyunableng paggastos kan pondo kan Office of the Vice President (OVP) asin Department of Education (DepEd).
Alagad maski ibinasura kan Senado an kaso sa paagi kan pagbebweltada kaini sa Kamara, pigdeklarar na nagbalgar sa Konstitusyon kan Korte Suprema an impeachment process ni VP Duterte.
Siring man, nilinaw ni SC Spokesperson Camille Ting na dae kaini piglilinig si Duterte sa mga paratang kan katiwalian.
