Mogmang pigheras kan OPM singer asin former “PBB Celebrity Collab Edition” housemate Klarisse de Guzman na dati nang pig tap na iyong mag record sa original theme song kan upcoming series na “The Alibi.”
Pig-anunsyar man kan Star Music an bareta sa paagi kan social media post kan i-upload an sarong ladawan ni de Guzman asin man composer na si Jonathan Manalo.
Marurumdumang kan nakalihis sanang bulan kan pig-anunsyar man na sinda Kim Chiu asin Paulo Avelino an naka-set na ma-bida sa series na “The Alibi.” na isinurat man ni Danica Mae Domingo asin idederek ni FM Reyes asin Jojo Saguin.
Ini na an magigin pang apat na collaboration kan duwa, na kun saen primerong nagtambal an mga ini sa hit series na “Linlang” na iniluwas kan taong 2023, kasunod kaini nagbida man sinda sa seryeng “What’s Wrong With Secretary Kim,” an Philippine adaptation kan hit South Korean drama.
Makalihis an duwang series nag tambal liwat sa primerong movie project na “My Love Will Make You Disappear,” na ipinaluwas man sa sinehan kan nakalihis na bulan nin Marso.
Mientrastanto, labi na man an pagpreparar ni de Guzman para sa saiyang papadangadang na konsyertong “The Big Night” sa Araneta Coliseum sa papaabutong September 26.
