Milyong mga evacuees an nakabalik na sa saindang mga istaran makalihis bawion an mga patanid kan tsunami sa bilog Pacific sarong aldaw makalihis magtama an sarong 8.8-magnitude na linog sa baybayon kan Kamchatka peninsula sa Russia.
Nagkawsa ini nin paramientras na mass evacuation gikan Japan hasta Hawaii, Chile, asin Ecuador, kun saen pigkakarkulong maabot sa apat na metro an posibleng langkaw kan hukol.
Sa Japan, haros duwang milyong katao an pig-ibakwar, asin paramientras in-evacuate man an Fukushima nuclear plant.
Sarong babae man sa Japan an nairehistro na binawian nin buhay makalihis mahulog an saiyang lunadan sa bangin mantang nag eebakwar.
Sa Chile, labi sa 1.4 milyong katao an naibakwar sa inapod man kan gobyerno komo pinakamahewas na evacuation sa historya kaini. Mayo man nin nairehistro na danyos kawsa kan Tsunami.
Sa Galápagos Islands, bahagyang paglangkaw nin tubig-dagat sana an nairehistro asin man marikas na nagbalik sa normal an sitwasyon.
Mientrastanto, sa parte man kan Severo-Kurilsk, Russia, nairehistro an pinakamalalang danyos na kun saen binaha nin tsunami an sarong daungan asin nilamon nin tubig an pabrika sa lugar.
Nairehistro man an pagputok kan Klyuchevskoy volcano makalihis an linog. Sigun sa US Geological Survey, kabali an linog sa 10 pinakamakusog sa kinaban magpuon kan nakalihis na taong 1900, asin igwa nin 59% posibilidad nin aftershock na mas makusog man sa magnitude 7 sa masunod na semana.
