NAGA CITY- Kaipuhan soboot pag-adalan nin marhay an planong paghali sa Senior High School Curriculum.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan DepEd Camarines Sur, sinaysay kaini na sa presente mas pinapusog na an pigtatangro na curriculum kun saen pig-aapod ini ngunyan na Strengthened SHS Program.
Sigun sa opisyal, an nasambitan ng pagbabago an pigdesinyo tanganing masierto na an mga estudyante makakua o makanood nin mga skills asin competencies na nakalinya sa demands kan higher education, middle skills development, employment, asin entrepreneurship.
Apwera digde, makakatabang man ini tanganing makasabay sa bagong teknolohiya an mga estudyante siringman makakasabay an mga paratukdo sa saindang mga mandato.
Dugang pa kan opisyal, sa paagi kan pagbabago na ini, mas nagigin relevant an curriculum sa pangangaipuhan kan mga learners asin komunidad.
Mientrastanto, enkaso man maibusol talaga an paghali sa SHS Program mawawaran nin trabaho an kadakol na mga teaching asin non-teaching personnel na naka-assigned sa Senior High School, makriar soboot ini nin mas orog pang problema sa gobierno.
Huli kaini, kaipuhan na pag-adalan nin marhay kan mga lehislador an saindang mga lakdang dapit sa isyu.
Sa ngunyan, pigsierto na sana kan opisyal na padagos an saindang paghahanap nin mga paagi tanganing mas magin marhay pa an kalidad kan edukasyon sa nasyon.
