Pigkumpirmar ni COMELEC Chairman George Erwin Garcia na nakatalaang pirmahan ni Presidente Ferdinand Marcos Jr an prosopwestong ley na nagpapauktaba sa Barangay asin Sangguniang Kabataang Elections (BSKE) ngunyan na Disyembre asin an pagbabago sa mga termino kan mga maeelehir na opisyal.
Sigun ki Garcia, sa Nobyembre na kan masunod na taon isasagibo an BSKE.
Asin an magigin termino na kan mga meelehir na opisyal sa barabgay asin apat na taon na pwedeng mare-elect nin saro pang termino, mientrastanto an para sa mga maeelehir na opisyal man kan Sangguniang Kabataan an apat na taon man alagad sarong termino sana sinda pwedeng makapagserbi.
Alagad maski, ini an dae madadagos, pigsierto mi Garcia na dagos pa man an saindang pagpepreparar siring na sana kan presenteng isinasagibong 10 aldaw na voters registration.
Pati na man an nagkapirang procurement kan mga ballot boxes asin folders na gagamiton huli ta dae man ini nakakaapektar.
Paglilinaw ni Garcia na mayo pa man sindang nailuluwas na pondo para digde.
Mientrastanto, inihayag man ni Garcia na an desisyon na ini an magigin dakulang kaginhawaan sa poll body huli na man ta presente sindang nagpepreparar sa primerong Bangsamoro Parliamentary Elections.
Padagos na pig-enkaminar ni Garcia an publiko na magpartisipar sa 10 aldaw na voters registration kan komisyon.
Pwede soboot sindang magpasiring sa saindang mga local COMELEC offices, satellite registration sites asin an bagong Register Anywhere Program na pwedeng isagibo sa mga mall, terminal, asin iba pang lugar na pwedeng pagdausan kan registration.
An mga mawot na magpa-rehistro an kinakaipuhang magdara nin orihinal na kopya kan government issued IDs asin para man sa mga kajovenan an saindang school IDs.
