Nagtitinir sa critical high treshold an lebel kan tubig sa Laguna Lake sa ibong kan dagusang paghupa kan mga makukusog na pag-uran sa National Capital Region asin Calabarzon.
Ini an basado sa record kan apat na Laguna Lake Development Authority (LLDA) Water Level Monitoring Station Radar Level Sensor (RLS) sa palibot kan lawa.
Sa South Bay, Laguna nag-abot sa 12.84 meters an lebel kan tubig mantang 12.82 meters man sa East Bay sa Lumban, Laguna.
Sa Central Bay sa Cardona, Rizal, naikurit an hasta 12.84 meters na water level mantang sa West Bay sa Muntinlupa City nag-abot sa 12.88 meters.
An mga ini an pawang mas halangkaw kumparar sa 12.50 meters na critical high treshold na basehan para sa dagusang paglangkaw kan alerto.
Basado sa mga naenot na technical assessment na isinagibo sa nasambitan ng lawa sa mga nakalihis na bulan, inabot nin sarong bulan antes dagusang magbaba an water level kan Laguna Lake kun maglampas na ini sa critical level, orog na sa panahon kan tag-uran.
Enot ining ipiglangkaw sa nasambitan ng alerto kan nakalihis na Hulyo 24, 2025 makalihis na mag-abot sa 12.51 meters an water level kaini.
Sigun sa LLDA, nagtitinir an 24/7 monitoring na piggibo sa nasambitan ng lawa, orog na sa epekto kaini sa hababang komunidad sa palibot kan lawa.
Sa presente nakalubog pa man an nagkapirang mga shoreland barangay sa palibot kan lawa mantang an nagkapirang pamilya na nakaistar sa hababang komunidad an nagtitinir na nakaistar paramientras sa mga evacuation center.
