NAGA CITY – Nakapagpuli nin mga medalya an tulong estudyante kan Naga Parochial School makalihis magin parte sa International Competition.
Sigun ki Keifer Romero Felipe- Singapore International Math Olympiad Challenge (SIMOC 2025), Gold and Bronze Medalist, sinaysay kaini na duwa sa mga binalihan kaini na kumpetisyon an personal na nagdayo sa mga lugar, mantang an iba pigkundusir online.
Kabali sa mga nasyon na binalihan kaini iyo an sa Thailand, Hong Kong, Malaysia, asin man Singapore.
Nakapagpuli ini nin gold asin bronze medal sa kakatapos sanang Singapore International Math Olympiad Challenge 2025 kan nakalihis na bulan nin Hulyo.
Mantang maogma na pigheras man ni Nathaniel Ezekiel C. Toledano – World Mathematics Invitational (WMI), Silver Medalist an napangganahan kaining silver medal sa nasambitan ng kumpetisyon na pigkundusir sa nasyon nin Thailand.
Saro ining advance Mathematics competition na kun saen igwa nin duwang parte, iyo an Part A saka Part B.
Sigun ki Tolenado, sa saiyang eksperyensya, mas madali simbagan an math problems sa primerong parte kan kumpetisyon kumparar sa Part B.
Aminado ini na nagin dipisil an bilog na durasyon kan kumpetisyon alagad bakong rason tangani pagsukuan, imbes nagsirbing hamon ini sa saiya.
Sa ibong na lado, nakapagpuli man si Al Gabriel Joaquin A. Venzon nin gold medal sa Iloilo World Shoot 2025. Pigtawan duon kan mga winners na dae sinda matrayumpo sa laban kun bako dahil sa paglapigot asin man bilog na suporta kan saidang team.
Antes pa man na magsabak, pig kundisyon na an saindang mga isip asin utak sa pag solve kan manlaen-laen na mga math problems. Sa paagi kaini, nahahasa an saindang abilidad na ma-familiarize asin makaisip tulos nin simbag.
Sa ngunyan, pig inkaminar pa ninda Venzon an saindang kapwa estudyante orog na an mga disganado sa subject na Math, na kaipuhan sana na ma-practice an saindang abilidad sa pag solve, asin man dae pag isipon na dipisil an mga ini, imbes magin maogma sana asin isaisip an dedikasyon.
