Pinuna ni Senate Committee on Energy Chairman Erwin Tulfo an marikas na pag-implementar kan oil price hike kasunod kan paglangkaw kan presyo sa pankinaban na merkado, mantang haloy man an pag-papaotob kan rollback.
Ipinahayag ni Tulfo sa pagdangog kan Senado manungod sa mga isyu sa sektor kan enerhiya, kun sain saiyang hinapot kun igwa nin kapangyarihan an pamahalaan na seguraduhon na makatanusan an pagpresyo kan mga kumpanya nin langis.
Segun sa senador, dapat ipaliwanag kun tano ta tulos na naipapatupad an dagdag-presyo dawa an mga produktong ibinebenta pa sa mga gasolinahan posibleng nabakal sa mas hababang kantidad.
Hinapot man niya kun tano ta dai nguna maubos an mas barato na stock bago ipatupad an bagong presyo, asin kun paano kinukwenta an mga pagbabago sa presyo kan petrolyo.
Dawa ngani binibisto an market-driven na sistema nin pagpresyo, iginiit ni Tulfo na dapat man protektahan an mga mamimili kontra sa sunod-sunod na paglangkaw kan presyo.
Konektado ini sa mga panukalang repasuhon an Oil Deregulation Law tanganing mapakusog an transparency sa pagpresyo asin an papel kan pamahalaan sa pagprotekta sa mga konsyumer.
