Sa tahaw kan nagdadangadang na Super El Niño, nagpahiling an Department of Social Welfare and Development (DSWD) nin sarong praktikal asin importanteng solusyon tanganing seguraduhon an suplay nin maiinom na tubig para sa gabos.
Mismo si DSWD Secretary Rex Gatchalian an nagdemonstrar kun paano an simpleng timba asin sarong Water Filtration Kit pwedeng makagibo nin malinig asin maiinom na tubig hale sa tubig-ulan.
An inisyatibang ini, na ipinahiling sa sarong press briefing sa Malacañang kan nakaaging Miyerkules, sarong proaktibong lakdang tanganing labanan an posibleng kakulangan sa tubig na dara kan El Niño.
Sa demonstrasyon, ipinahiling ni Gatchalian an paggamit kan Water Filtration Kit, kun sain nagdugang pa siya nin supot nin daga sa tubig tanganing mas ipahiling an epektibidad kan sistema.
Matapos an proseso nin pagsala, an tubig nagin malinig asin seguradong maiinom.
Parehong tinikman ninda Gatchalian asin Palace Press Officer Atty. Claire Castro an sinalang tubig, bago ninda pinatesting man sa mga miyembro kan media.
Segun ki Gatchalian, an mga Water Filtration Kit na ini ipapanao sa mga lugar na idineklara sa state of calamity tanganing magkaigwa an mga residente nin akses sa malinig na tubig.
An kada kit pwedeng magamit nin sagkod limang taon basta ini liniligan nin tama asin regular.
Sa masunod na semana, pormal nang sisimulan kan DSWD an pagpadara kan mga balde asin pagkakabit kan Water Filtration System sa mga kabahayan.
An kit madali sanang i-install asin idinisenyo para sa simpleng paggamit sa harong.
“Walang chemicals, walang machinery, walang kuryente na kailangan diyan sa pagpapatakbo niyan,” aniya, na nagpapahiling kan pagiging user-friendly kaini.
Tiniyak man ni Gatchalian sa publiko na an sinalang tubig gamit an kit ligtas inumon kan gabos, kaiba na an mga omboy.
An paggamit kan teknolohiyang ini sarong kritikal na paagi tanganing maprotektahan an salud kan komunidad asin seguraduhon an seguridad sa tubig sa panahon nin krisis.
Ini nagpapahiling kan dedikasyon kan DSWD na magtao nin praktikal asin sustenableng solusyon sa mga hamon na dara kan pagbabago kan klima.
Sa paagi kan inisyatibang ini, mas magigin handa an mga komunidad sa Bicol asin sa bilog na nasyon sa mga epekto kan El Niño, na nagtatao nin paglaom asin kaligtasan sa tubig.
