Pupuonan na kan Commission on Elections (COMELEC) an pag-imprenta kan mga opisyal na balota para sa Bangsamoro Parliamentary Elections (BPE) sa maabot na Setyemnre 8 sa National Printing Office sa Quezon City.
Sigun ki COMELEC Chairman George Erwin Garcia, maabot sa labi 2.3 milyong balota an iimprenta asin piglalaomang matatapos sa laog sana kan pitong aldaw kaibahan na an proseso kan beripikasyon.
Basado kaya sa report kan Project Management Office kan poll body, pig-urong an pag-imprenta tanganing masuri pang marhay an kabilogan kan ley.
Pagsisiserto ni Garcia na dae man ini magigin masakit para sa komisyon huli sa 2.3M sana an saindang balota. Madugang na man sinda nin mga personahes sa National Printing Office tanganing maparekas an proseso kan beripikasyon.
Naantala an naenot na iskedyul kan pag-iimprenta makalihis na makaresebir nin impormasyon an opisina na pwedeng maapektaran an ballot face template huli sa prosopwestong ley na nagrere-distribute kan pitong parliamentary seats.
Kasunod kan desisyon kan Korte Suprema na dae na kaibahan an Sulu sa Bangsamoro region, liwat pigpakarhay an alokasyon kan mga pwesto.
Katakod pa kaini, magkakaigwa man nin adjustment sa deployment an mga election paraphernalia huli sa nangyaring pagbabalyo. Kakaipuhanon man nin 12 aldaw para man i-reconfigure o pakarhayon an gagamitong mga Consolidated Canvassing (CCS) na importante sa pag-ako kan boto kan mga Automated Counting Machines.
Pigsierto man ni Garcia sa mga taga-Bangsamoro na madadagos an saindang parlyamentong eleksiyon sa Oktubre 13. Asin igwang bastanteng oras an poll body para sa mga pagbabago na gigibuhon.
