NAGA CITY- Pigheras kan pamayuhan kan Department of Education Camarines Sur an mga bagay na pigtatagamahan kan saindang pondo.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan DepEd-Camarines Sur, sinaysay kaini na an pondo na gikan sa Personal Services an pigdudugang tanganing mabilog an paghire sa numero kan mga kinakaipuhang non-teaching personnel na pigrequire kan DepEd.
Ini an tanganing makapokus na an mga paratukdo sa saindang trabaho asin mahali na an mga pagigin clerk asin office workers kan mga teaching personnel.
Dugang pa ni Pelingon, an pondo man na gikan sa Maintainance and other operating expenses o MOOE an ginagamit sa mga bayadan siring kan kuryente, tubig, general services, pambakal nin mga office supply asin iba pa.
Mantang an capital outlay fund ginagamit man para sa pagbakal nin mga buildings, daga na para sa mga eskwelahan o para sa mga dugang na school sites para sa mga nangangaipuhang estudyante.
Mientrastanto, an paggastos soboot kan pondo an kinakaipuhan na pakarhay asin igwang transparency tanganing dae pagpuonan nin dakulang problema sa mga masunod man na panahon.
