Pigbuyagyag ni Senator Panfilo Lacson na pigpapabakal an accreditation kan mga kontratista kan mga government projects siring kan flood control projects.
Sa interpelasyon sa privilege speech ni Lacson dapit sa kalakaran kan mga ghost projects, nahapot ni Senate Minority Leader Tito Sotto III kun panong na-accredit an nagkapirang kontratista na kaibahan sa 15 contractors na pigtukoy kan Presidente na nakakua nin dakulang pondo kan flood control projects na napag-araman na pagsasadiri man palan an construction company na blacklisted na sa gobierno.
Basado sa naguno na impormasyon ni Lacson, nagpupuon sa P2 million an bayad sa Philippine Contractors Accreditation Board o PCAB asin ini na an bahala sa bank certifications asin gabos kan requirements para sa saindang accreditation.
Pigpunto man kan senador na kaibahan an burukrasya huli ta pigpapabakal an accreditation kan mga kontratista na sa huri an nababayadan man palan kan gobierno sa mga maanomalyang proyekto.
Huli digde, nagkasundo sinda Lacson asin Sotto na haputon digde an Philippine Contractors Accreditation Board sa masunod na pagdangog kan Senate Blue Ribbon Committee.
