Ipinahiling liwat ni Filipino-American NBA star Jordan Clarkson an saiyang suporta sa kapwa atletang igwang dugong Pinoy kan magdalan ini sa laban ni Filipino-Canadian tennis star Leylah Fernandez sa US Open sa New York.
Kun saen matrayumpo na naipagana ni Fernandez an enot na rount kontra ki Rebecca Marino, 6-2, 6-1.
Makalihis na laban, ipigheras kaini sa Instagram an litrato ninda Clarkson asin sinaysay na “Great meeting you yesterday!!”Apwera ki Fernandez, pig-omaw man ni Clarkson an trayumpo kan Filipina tennis prodigy na si Alex Eala, naggibo nin historya komo primerong Filipina na nanggana sa US Open main draw makalihis na daugon si Clara Tauson kan Denmark.
Bako ini an enot na pagkakataon na sinuportaran ni Clarkson si Fernandez—kan nakalihis na bulan, nahiling man ining nasa player’s box ni Fernandez sa Wimbledon.
Ikinaogma man ni Fernandez an pagkakaigwa nin koneksiyon sa kapwa atleta na igwang dugong Filipino siring ninda Clarkson asin Eala, asin sinaysay kaining igwang mutual respect sinda ni Eala tuyong sinda an nagkakahilingan.
Mientrastanto parehong nag-abante sa ikaduwang round kan US Open sinda Fernandez asin Eala.
