Kinumpirmar kan Philippine Statistics Authority na nagkaigwa nin paglangkaw sa presyo kan mga barakalon o inflation sa nasyon ngunyan na bulan nin Agosto.
Susog ki PSA National Statistician asin Undersecretary Dennis Mapa, nagsakat an inflation sa 1.5% kan nakalihis na bulan.
Ini an mas halangkaw kumparar sa 0.9% na nairehistro kan bulan nin Hulyo. Huli sa paglangkaw na ini, nairehistro an average inflation para sa presenteng taon sa 1.7%.
Susog sa gobyerno, an average inflation na ini an laog pa man sa saindang target range para sa bilog na taon kan 2025.
Ipinaliwanag kan lado kan PSA na an paglangkaw kan inflation an pangunahing kawsa kan mas marikass na paghiro kan presyo kan nagkapirang partikular na produkto asin serbisyo.
Kabali na digde an paglangkaw kan presyo kan mga gulay asin sira sa mga merkado.
Apwera pa digde, nagkaigwa man nin paglangkaw sa singil sa kuryente, tubig, asin renta sa harong, na nag-ambag man sa paglangkaw kan inflation.
Mientrastanto, sa Metro Manila, an inflation an nagrikas sa 2.9% gikan man sa 1.7%. An nasambitan ng pagrikas na ini an naikonektar sa mas marikas na paglangkaw kan presyo nin pagkakan sa rehiyon.
