NAGA CITY- Pigpaliwanag kan sarong abogado an dapit sa katuyuhan kan binilog na Independent Commission for Infrastructure o ICI ni Presidente Ferdinand Bongbong Marcos Jr.
Sa entrevista kan Bombo Radyo Naga ki Atty Michael Henry Yusingco Political Analyst/ Constitutionalist, sinaysay kaini na dae masyadong makakatabang an ICI sa pagpapakulong asin pagbawi sa mga kwarta na hinabon kan nagkapirang mga imbwelto sa katiwalian na nangyayari sa nasyon.
Ini nin huli ta an nasambitan ng komisyon an sarong fact-finding body, boot sabihon sinda an mayong kapangyarihan na mag-asunto siring na sana kan pigsambit kan Presidente.
Huli kaini, dae maaabot kan mga tawo an kamawotan na mapanimbag an mga corrupt na mga lehislador, DPWH officials, contructors asin iba pang personalidad na imbwelto sa nasambitan ng isyu huli ta an output kan ICI an magseserbeng rekomendasyon sa Presidente sa tawong sangkot digde.
Marurumduman, an ICI an mangengenot sa imbestigasyon sa mga iregularidad bako sana sa flood control projects kundi magin sa gabos kan national government infrastructure projects sa nakalihis na sampulong taon.
Pigpapamayuhan ni dating Supreme Court Justice Andres Reyes Jr. komo chairperson an Independent Commission for Infrastructure o ICI kaibahan sinda dating Public Works Secretary Rogelio “Babes” Singson asin SGV & Co. country managing partner Rossana Fajardo, mantang pigtalaga man si Baguio City Mayor Benjamin Magalong komo special adviser asin investigator.
Sa ngunyan, hagad na sana ni Yusingco an kamarhayan kan nasyon sa ibong kan mga kontrobersiya na kinakahampang kan gobierno sa presente.
