Pigsumiter na kan Commission on Audit (COA) sa Independent Commission for Infrastructure (ICI) ngunyan na aldaw Biyernes, Setyembre 26 an 4 fraud audit reports katakod sa flood control projects sa probinsiya nin Bulacan.
Kaibahan digde an natuyaw na mga proyekto sa irarom kan Department of Public Works and Highways (DPWH) – Bulacan 1st District Engineering Office huli sa dae tugmang project sites, dati nang nakatindog na istruktura sabmga inaprobarang lokasyon asin nawawarang mga dokumento.
Sigun sa komisyon, gabos kan apat na proyekto, napag-aramang ipinautob na sa mga lugar na iba sa nakasaysay sa saindang kontrata o dae man kaya igwang mga istruktura nang nakatindog antes pa man naresebirbkan kontraktor an saindang notices to proceed o antes pa man puonan an kontrata.
Katakod kaini, patanid kan COA na an modus na ini an nakapagpapalangkaw kan peligro kan pagkadoble o salang representasyon na kumpleto na an proyekto kun saen nagkapirang government engineers asin private contractors an posibleng igwang paninimbagan sa pagbalgar sa procurement laws asin anti-graft statutes.
Igwang tolong iba pang proyekto na natuyaw man sa fraud audit reports na ipinautob kan Topnotch Catalyst Builders, Inc. o independently o sa paagi kan joint ventures.
An mga indibidwal na natuyaw sa audit reports an pwedeng mahampang sa criminal charges para sa graft and corruption, malversation and falsification of public documents asin pagbalgar sa Government Procurement Reform Act asin COA regulations.
Nilinaw man kan audit body na an listahan kan mga liable na indibidwal an bako pang pinal asin pwede pang madugangan mantang nagpapadagos an imbestigasyon.
An panibatong batch kan fraud audit reports an parte kan nagpapadagos na audit sa flood control projects ka DPWH sa Bulacan puon Hulyo 1, 2022 hasta Mayo 30, 2022.
Piglalaomang makakatabang ini sa parallel investigation kan ICI sa soboot maanomalyang mga proyekto.
