Ikinaogma kan Department of Agriculture an nagin pag-apruba kan Mababang Kapulungan kan Kongreso sa prosopwestong budget na nagkakantidad nin P216.1 bilyon para sa taong 2026.
Sigun ki Agriculture Secretary Francisco Tiu Laurel, an inaprubahang budget na ini an nagpapahiling kan paglangkaw na nag-abot sa P39.4 bilyon kumparar sa orihinal na alokasyon na P176.7 bilyon.
Piglalaomang matao an pondong ini nin mas mahewas asin mas epektibong pagpapakusog kan mga imprastraktura na nagsusuporta sa agrikultura, na iyong susi sa paglangkaw kan produksiyon asin kita kan mga paraoma asin parasira.An dakulang alokasyon na ini an parte kan sarong mas mahewas na realignment na direktiba mismo ni Presidente Ferdinand Marcos Jr.
Sa laog kan P39.4 bilyong paglangkaw, an P22.5 bilyon an nakatagamang mapasiring sa opisina kan sekretaryo kan DA.
An natatadang P16.9 bilyon man an itatagama sa pagsuporta sa liwat na pagtatanom kan niyog, pagpapahusay kan crop insurance tanganing mas kadakol na paraoma an maprotehiran, pag-upgrade kan mga fish port tanganing mapamarhay an kalidad asin kalinigan kan mga sira, pagpapatindig kan farm-to-mill roads sa mga lugar na nagtatanom nin tubo, asin pagpapatindog kan mga modernong post-harves facilities tanganing malikayan an pagkaraot kan mga pananom makalihis an anihan.
