Nagpaliwanag si Senate President pro-tempore Ping Lacson dapit sa nagkukuriyat na ladawan kaini kaiba an mag-ahom na contractor na si Curlee asin Sarah Discaya.
Paglilinaw ni Lacson, kinua an litrato kan huring semana kan bulan nin Abril na pagtatapos kan 90-day campaign period para sa 2025 midterm elections.
Antes soboot an paghihilingan, minsan ining binisita sa saiyang opisina sa Taguig kan campaign supporter gikan sa Davao City na si Fred Villaroman asin kaiba kaini an aki ni Discaya asin man iniimbitaran ini para sa grand rally sa saro sa mga probinsya kan Davao.
An aking Discaya an nagdadalagan komo party-list representative kan Ako Pinoy o Ako’y Pinoy. Sunod na nag abot an mga magurang kan aking Discaya asin naghaloy sana nin 15 hasta sa 20 minutos an saindang pag-uulay.
Paglilinaw pa ni Lacson, sinayumahan kaini an alok kan mga ini na mag iba sa campaign rally komo respeto na rin sa saiyang amigo na si Senate President Tito Sotto III na kun saen an pamangking si Mayor Vico Sotto an kalaban man sa mayoralty race an mga Discaya.
Pigtawang-duon pa kan senador na dae kaini bistado an mga Discaya asin ini sana an primero asin sulamenteng pagkakataon na nakaiba kaini an mga Discaya antes pa man pumutok an imbestigasyon kan Blue Ribbon Committee.
