Apektado an labi sa 171,000 na indibidwal o katampad kan 47,000 na pamilya gikan sa 53 barangay dara pa man kan nagin magnitude 6.9 na linog na nagtama sa Cebu City kan nakalihis na Martes.
Sigun sa Office of Civil Defense (OCD), gikan sa numero na ini haros 4,000 pamilya o katampad kan 20,000 na mga indibidwal an nagtitinir sa luwas kan mga evacuation centers dara kan mga aftershocks sa lugar.
Kasunod kaini, pigsierto ni OCD Deputy Administrator for Administration Asec. Bernardo Rafaelito Alejandro IV na padagos sana an operasyon kan National Disaster Risk Reduction and Management Council (NDRRMC) para sa assessment kan presenteng sitwasyon sa Bogo, Cebu na iyong pinaka-nadanyaran kan linog.
Mientrastanto, basado man sa inisyal na assessment kan OCD, nangangaipuhan sa ngunyan an mgalugar kan Medellin, Sogod, Bogo City, asin Daanbantayan nin power generators, maiinom na tubig, hygiene kits, tents, trapal, flashlights asin batteries, mga food packs, asin magin internet connectivity.
Pinakatinutokan na sa ngunyan kan ahensiya asin kan gobyerno an tolong pinakakaipuhan ngunyan kan mga apektadong lugar partikularmente na an power restoration, komunikasyon asin magin mga housing needs sa dakol kan mga partially asin fully damaged na kaharongan asin imprastraktura sa lugar.
