Labi 20 katawo an nalugadan matapos tamaan nin makusog na linog na may magnitude 5.7 an Shizuoka Prefecture sa sentral Hapon kan madaling aldaw nin Domingo, Nobyembre 8.
Segun sa Japan Meteorological Agency, namati an “upper 5 intensity” sa scale na zero sagkod pito sa Chita City, Aichi Prefecture, na nasa pagdolonan kan Shizuoka. Mayong banta nin tsunami an naireport.
Idinugang pa kan ahensya na ngonyan lang giraray nairehistro an siring na kusog nin paglinog sa Aichi poon kan huri ining namati 30 taon na an nakalihis.
Namati man an “lower 5 intensity” sa mga probinsya kan Aichi, Shizuoka, Gifu, asin Nagano.
Base sa estimasyon kan ahensya, posibleng may rarom na 41 kilometro sa solnopan na parte kan Shizuoka an epicenter kan nasabing linog.
Base man sa report kan mga awtoridad sa Higashiura, Aichi, naantala an suplay nin tubig sa nagkapirang parte kan banwaan.
Naireport man an pagtama nin nagkapirang mas maluluya na aftershocks.
