Nag-abot kasuodma sa Department of Justice an presenteng sekretaryo kan Department of Interior and Local Government na si Secretary Jonvic Remulla.
Personal ining nagbisita sa ahensiya tanganing mapag-ulayan soboot an pormal na pagbabalyo o transitioning kan Bureau of Jail Management and Penology sa Bureau of Corrections.
Sigun sa sekretaryo, obheto nindang mapagsaro an duwang ini na piglalaomang maisasakatupadan sa masunod na taong-2026.
Dugang kaini makakatabang an ‘transitioning’ tanganing gibuhon o mapagsaro an records kan mga ‘persons deprived of liberty’ o PDLs na igwang kasong pigkakahampang.
Mantang sa entrevista kaibahan an sekretaryo, saiyang pigkumpirmar na nakaresebir an ahensiya nin mga ‘reports’ gikan sa mga Local Government Units o LGUs.
Mapadapit soboot ini sa maanomalyang mga proyekto kun saen inireport an mga nadiskubreng ‘substandard’ asin ‘ghost projects’ sa kaniya-kaniyang nindang mga lugar.
Sigun ki Sec. Remulla, saindang iko-compile an mga report na gikan man sa mga alkalde, governor, o local government officicials.
Piglalaomang isusumiter an compilation kan reports sa katapusan kan bulan sa opisina ni Presidente Ferdinand ‘Bongbong’ Marcos Jr.
Mientrastanto, pigsierto man ni Sec. Jonvic Remulla an kapreparaduhan sa epektong dara kan bagyong Paolo sa nasyon.
Naalertuhan na an Office of the Civil Defense, mga evacuation centers, pigsiertong nakapreparar na sigun sa sekretaryo.
Magin an food packs na iheheras kan Department of Social Welfare and Development an saiyang sinaysay na preparado na man.
An naganap man na linog sa Cebu partikularmente sa siyudad kan Bogo na nanutarang posibleng igwang isyu an ipinatindog na establisyemento kan City hall an pigpapa-imbestigaran na kan sekretaryo.
Huli digde, direktiba kaini sa mga lokal na gobyerno sa kaganapan na linog an masierto an dae pagkakaigwa nin looting, harabonan sa harong asin pati sexual abuse.
