Aram baya nindo mga ka-bombo, an AI-generated na aktres na si Tilly Norwood an pighihiling komo potensyal na global star sigun sa saiyang creator.
Susog sa report, an Artificial intelligence an padikit-dikit na piglalaog an manlaen-laen na sektor kan komunidad asin job market.
Katakod kaini, an mga AI-generated actors an pigpepreparar tanganing magtindog komo karibay kan saindang human counterparts.
An Artificial intelligence talent studio na Xicoia, nagin sentro kan kontrobersiya huli sa pagpromoter kaini kan sarong makangalas na AI-generated aktres na igwang pangarang Tilly Norwood.
Ini an piglunsar kan Dutch technologist na si Emily Van der Velden komo parte kan saiyang kompanya na Particle 6 Productions.Sinda an specializes sa AI acting talent kun saen si Tilly an saindang enot na dakulang proyekto na pigsasaysay na masikat siring ni Scarlett Johansson.
Sa ngunyan, padikit-dikit na pigpapabisto si Tilly Norwood sa social media kun saen padagos an pag-post nin mga ladawan asin clips na igwang manlaen-laen na settings an tanganing ipahiling an pagigin versatile kaini.
