Tolong sunod-sunod na road crash an nairehistro sa Barangay Concepcion Pequeña, Naga City, kan Oktubre 22, 2026.
Sa intrevista Kan Bombo Radyo Naga Ki PMAJ Rey Alvarez, sinabi kaini na an enot na insidente nangyari bandang alas-4:45 nin hapon, na kinasangkutan nin sarong truck asin Sedan sa atubangan kan sarong planta.
Segun sa imbestigasyon, nagkasundo an mga driver na sinda na mismo an maareglo asin maayos kan mga danyos sa mga sasakyan.
An ikaduwang insidente nangyari man sa atubangan kan Immaculate Conception Church. Kun saen dae na naabutan kan mga imbestigador an mga imbwelto sa lugar, kaya padagos pa an imbestigasyon, kaiba an pagrepaso sa mga CCTV footage, huli ta magkakaiba an bersyon kan mga driver sa nangyari.
Nairehistro man an ikatulong insidente sa Magsaysay Avenue, kun sain nagbanggaan an mga sasakyan. Sa isinagibong imbestigasyon, nagkasundo man an mga driver na mag-settle kan mga gastos asin danyos.
Mayo man naireport na nakainom sa mga driver na imbwelto sa mga aksidente.
Mientrastanto, an mga imbwelto sa duwang insidente, naissuehan nin citation tickets, mantang padagos pa an proseso kan mga imbestigador.
Segun sa Alvarez, kapwa may pananagutan an mga driver sa mga insidenteng naareglo, na posibleng mapasakop sa kasong Reckless Imprudence Resulting in Damage to Property.
Tinawan-duon man kan mga awtoridad na base sa mga inisyal na imbestigasyon, dai pa masasabing accident-prone area an naunambitang lugar.
