Presenteng isinasagibo an rescue operations sa labi sa 200 hikers na na-trap sa slopes kan pinakahalangkaw na bundok sa bilog na kinaban an Mt. Everest makalihis man na bumagsak an tipak kan mga niyebe.
Basado sa mga report, nasa 350 hikers na an naibakwar kan mga rescuer pasiring sa salbado na lugar.
May pirang tents man an natabunan kan mga niyebe mantang pig iibakwar kan mga rescuer an mga grupo kan mga turista gikan sa mga bumagsak na niyebe.
Enot kaini, kadakol na mga turista an nakipagsapalaran na mag-trekking sa Tibetan valley pasiring sa eastern side kan Mount Everest kan nakalihis na weekend kasabay kan pagpupuon kan walong aldaw na national holiday sa China.
Sikat an nasambitan ng lugar sa mga turista komo hiking spot orog na pag abot kan inaapod na “Golden Week holiday”.
Nangyari man an insidente sa tahaw kan pirang aldaw na mataot na kamugtakan kan panahon sa rehiyon.
Sa karatig kaini na Nepal, nasa 47 katao na an binawian nin buhay magpuon kan Biyernes makalihiss an magagabat na pag-uran na nagkawsa man nin mga pagrasay kan daga asin man mga pagbaha.
