Dae nahihiling na huma kan Malacañang an liwat na pag-urulay dapit sa pagriribay nin liderato sa senado, maski pa sarong bulan pa sana puon kan magkaigwa nin pagbabago sa liderato kan halangkaw na kapulungan.
Sigun ki Palace Press Officer Claire Castro, normal sa demokrasya asin derechos kan mga Senador na magpili nin lider na mawot nindang mamayo.
Pigtawan duon pa kan palasyo an pahayag kan Senate leadership na nagtitinir na pusog an institusyon sa ibong kan mga intriga.
Pigsierto man kan Malacañang na dae madidiskaril an legislative agenda kan administrasyon asin piglalaoman kaining eenoton kan mga Senador an interes kan taumbayan kaysa pansadiring pulitika.
Marurumduman, enot naman na nagpahayag kan saiyang confidence si Senate President Tito Sotto III na bilog pa man an suporta sa siya kan miyembro kan mayorya asin yaon an saiyang pagtubod digde.
