Ilinatag ni Senate Committee on Finance Chairman JV Ejercito an duwang panukalang batas na an katuyuhan iyo na pakusugon an transparency asin accountability, asin tawan an publiko nin mas dakulang papel sa paggastos kan gobyerno sa pondo kan nasyon.
An mga ini iyo an Senate Bill 2576 o an Bantay Budget Act, asin an Senate Bill 2577 o an Grassroots Participatory Budgeting Act.
Katuyuhan kan Bantay Budget Act na ma-institutionalize asin makapagtugdok nin mekanismo para sa partisipasyon kan mga organisasyon kan civil society sa pagpreparar asin pag-otorisa kan taunan na pondo kan nasyon.
Mantang, an Grassroots Participatory Budgeting Act man an katuyuhan na maisabatas an bottom-up approach para sa development planning asin budgeting, tanganing masiguro na an mga espisipikong pangangaipo kan mga komunidad asin mga prayoridad na proyekto kaiba na sa local asin national government spending plans.
Segun ki Ejercito, an Senado nagmamawot na magkaigwa nin makahulugan na papel an mga CSOs sa pagbusisi sa budget kan mga ahensya kan gobyerno, sa mga hapot na dapat simbagan kan mga opisyal, asin kun anong mga prayoridad an dapat gibuhon kan gobyerno.
Dugang pa kan senador, mahalaga an ambag kan mga organisasyon kan civil society sa pagbilog kan pondo kan nasyon huli ta sinda an direktang nakikipag-ugnayan sa mga komunidad, asin an saindang eksperyensya makakatabang sa mga mambabatas tanganing maaraman kun an alokasyon tunay na makakasimbag sa aktwal na pangangaipo kan mga namamanwaan.
