Iginigiit ni Senador Risa Hontiveros na dai dapat magin awkward an pag-atubang ni Bise Presidente Sara Duterte sa plenary deliberations kan Senado para sa 2027 budget kan Office of the Vice President (OVP).
Segun ki Hontiveros, linalaoman ninda na personal na mag-aatubang si Duterte sa plenaryo, arog kan ginigibo kan mga pamayo kan iba pang ahensya, tanganing depensahan an saindang kahagadan nin pondo.
Ini kasunod kan dai pag-atubang ni Duterte sa pagdangog kan Senate Finance Subcommittee kan Oktubre 20, kun sain naaprubahan sa lebel kan komite an P785.2-milyong budget kan OVP.
Si Chief of Staff Atty. Zuleika Lopez an nagrepresentar saiya, na nagpaliwanag na nasa Davao City an Bise Presidente para sa sarong inurnment.
Nagpahayag man nin paglaom si Senate President Sherwin Gatchalian na mag-aatubang si Duterte sa plenaryo, huli ta parati man na linalaoman sa mga pamayo kan ahensya na personal na depensahan an saindang proposed budget.
Nagpatanid si Hontiveros na kun dai na naman mag-aatubang an Bise Presidente, irerekord ninda ini bilang bakong tamang gawe para sa sarong pamayo kan ahensya na dai mag-atubang sa Kongreso para sa pondong hinahagad.
Lininaw man niya na an pag-atubang sa budget deliberations dai makakabari sa sub judice rule, huli ta suway na proseso ini sa impeachment proceedings.
