Nagbaba an paglaog kan bagas sa nasyon ngunyan na taon hasta enot na parte kan Oktubre huli sa paramientras na pagbabawal kan gobierno sa rice imports.
Sigun sa datos kan Bureau of Plant Industry (BPI), nagpakol sa 3.26 milyong metric tons (MT) an kabilugan na rice imports hasta Oktubre 2. Katampad ini kan 67.9 porsyentong record-high na 4.8 milyong MT kan nakalihis na taon.
Nangengenot pa man an Vietnam komo primerong supplier kan bagas sa nasyon kan 2024, na igwang 2.64 milyong MT o lampas 80% na kabilugang importasyon.Panduwa an Myanmar na igwang 343,910.33 MT (10.5%), asin pantolo an Thailand na igwang 176,270.26 MT (5.4%).
Kabali sa iba pang nasyong piggigikanan kan rice imports an Pakistan, India, South Korea, Cambodia, Singapore, Taiwan, Japan, Italy, asin Spain.
Pig-anunsiyar ni Agriculture Secretary Francisco Tiu Laurel Jr. sa pagdangog sa Kongreso kan Martes an pagpapalawig kan rice import ban hasta sa katapusan kan taon.
Obheto kaining maproteheran an mga paraoma gikan sa pagkalugi kawsa kan hababa na presyo kan paroy.Sigun sa opisyal, padagos an pagbaba kan presyo nin paroy huli sa labing supply asin maluyang kalidad kan butil kawsa kan mayong untok na pag-uran.
Paramientras man na hahalion an import ban sa Enero kan masunod na taon, alagad ibubweltada ini sa Pebrero tanganing mapapapusog an presyo sa panahon kan dry harvest.
Dugang pa ni Laurel na pigkonsederar ni Presidente Marcos an pagbweltada kan 35% na taripa sa imported rice.
Kun dae soboot maaprubahan, an alternatibong plano tutugutan sana an importasyon sa Enero asin ibabawal liwat puon Pebrero hasta Abril tanganing maproteheran an masunod na ani.
Pigsaysay kan Bureau of Customs na an pagbaba kan taripa sa 15% sa bisa kan Executive Order No. 62 na pinirmahan ni Presidente Marcos kan Hunyo kan nakalihis na taon na nagresulta sa P20 bilyong nawawarang kita sa laog nin 12 bulan.
Pigsierto man ni Agriculture Undersecretary Christopher Morales na bastante an suplay kan bagas para sa 60 hasta 120 aldaw na suspensyon kan importasyon.
Pigkakarkulong nasa pag-ultanan kan 3.24 milyon MT hasta 4.06 milyon MT an suplay kan bagas sa pagtatapos kan taon, bastante para sa 85 hasta 106 aldaw na konsumo sa bilog na nasyon.
Piglalaoman man kan Department of Agriculture na mapakol sa 20.29 milyon MT hasta 20.51 milyon MT an ani kan palay ngunyan na taon, mas halangkaw kumparar sa record harvest na 20.06 milyon MT kan 2023.
