Inako kan Department of Agriculture (DA) an angat kan Senado na pamayuhan mismo an pagpapautob kan mga proyekto sa farm-tp-market roads (FMRs), kasunod kan mga report kan soboot overpricing asin katiwalian sa mga nakalihis na proyekto kan Department of Public Works and Highways (DPWH).
Sa pagdangog kan Senado sa prosopwestong 2026 budget kan DA, sinaysay ni Agriculture Secretary Francisco Laurel na preparado sindang akuon an responsibilidad sa pagpapatindog kan farm-to-market roads alinsunod sa mga angat ni Senate Finance Committee Chairman Sen. Win Gatchalian.
Pigtawan-duon ni Laurel an importansiya kan proyekto bako sana sa mga paraoma kundi sa kabilogang kaunlaran kan agrikultira asin seguridad sa pagkakan kan nasyon.
Sigun ki Gatchalian, pigkakarkulong labi P10 bilyon, an posibleng nawaldas huli sa overpricing kan labi 70,000 kilometers kan FMR projects, na tinukoy komo mga ‘ghost” o “semi-ghost projects.”
An kantidad na ini, sigun sa saiya bastante tanganing magpatindog nin two-lane highway gikan sa Manila hasta Aparri.Hurot kan sekretaryo, dae ninda isasagibo an proyekto nin solo.
Makikipagtabangan soboot sinda sa mga local governments units (LGUs), mga farmers’ groups, asin mga independent auditors asin third-parte surveyors tanganing masierto an lambang piso kan pondon an mapapasiring sa tamang proyekto.
