Naglunsar an Israeli military nin sarong pag-atake sa Gaza kan nakalihis na Dominggo, susog sa mga Israeli media asin mga residentes, sa paagi kani garu nag labo an paglaom na an sarong US-mediated na untok-putukan an humantong sa panghaluyang katuninungan sa enclave kan basulon kan Israel an Palestinian militanteng grupo na Hamas.
An mga pag-atake kan Israel iyo an pinakaseryosong pagsubok kan sarong marupok nang untok-putukan, na nagin epektibo kan nakalihis na Oktubre 11.
Sinaysay kan mga Palestinian sa Gaza na nakadangog sinda nin mga pagsabog asin putok kan badil sa Rafah sa timog kan strip asin an mga saksi an magkakasuhay na nag-report kan makukusog nang putok gikan sa mga tangke kan Israel sa sirangang banawaan kan Abassan harani sa Khan Younis, siringman sa timog Gaza.
Nadangog kan mga saksi sa Khan Younis an sarong alon kan mga airstrike na inilunsar sa Rafah kan nakalihis na Dominggo nin pagkahapon.
Sinaysay kan mga Local health authorities sa Gaza na duwang Palestinian an binawian nin buhay sa sarong airstrike kan Israeli sa sirangang parte kan Jabalia sa hilagang Gaza.
Mientrastanto sarong opisyal kan militar kan Israel an nagsabi na an Hamas an nagsagibo nin kadakol na pag-atake kontra sa mga pwersang Israeli sa laog kan Gaza, kabali na an sarong rocket-propelled grenade attack asin sarong sniper attack kontra sa mga suldados na Israeli.
Sinaysay kan Senior Hamas official na si Izzat Al Risheq na an Palestinian militant group nagtitinir na nakatuon sa untok-putukan, na kun saen inakusaran kaini an Israel nin pauru-utro na pagbalgar. An government media office kan Gaza sinabing an Israel nakagibo nin 47 violations makalihis an nasambitan ng ceasefire deal, na nagwalat nin 38 gadan asin 143 irido.
