NAGA CITY- Nagpakol sa haros P2-M an nagin kita kan mga Micro, Small and Medium Enterprises sa pigkundusir na Feria de Camarines Featuring La Vida Coco.
Sa entrevista kan Bombo Radyo Naga ki Jay Percival Ablan, Provincial Director kan DTI-Camarines Sur, sinaysay kaini na magayon an nagin eksperyensiya kan mga MSMEs huli ta sinda nakapag generate nin maabot sa duwang milyon na kita sa nasambitan ng aktibidad.
Katakod digde, nag-abot man sa 92 na mga exhibitors gikan sa Camarines Sur an nagpartisipar kun saen highlight an mga coconut products.
Sigun pa sa opisyal kabali sa mga pigtangro sa event iyo an food and non food coconut products, christmas items na gibo sa niyog asin iba pa.
Mientrastanto, kun ikukumparar man kan nakalihis na taon an pinagkaiba kan pigsagibong Feria de Camarines Featuring La Vida Coco, nagin 3 and 1 an aktibidad sa presente. Ini nin huli ta bako sanang solo an event kundi pigsabayan kan Future tech na pigpartisiparan kan 10 exhibitors.
Sa nasambitan ng start up tech, an mga kabaling exhibitors nagtatangro nin teknolohiya na mapapakinabangan kan mga negosyante.
Sa ngunyan, pigsierto na sana kan opisyal na mapadagos an DTI-Camarines Sur sa pagbilog nin mga programa na makakatabang sa pag-uswag kan mga Micro, Small and Medium Enterprises sa ilog na probinsiya.
