NAGA CITY- Naaalarma an Department of Education Camarines Sur makalihis an pagluwas kan report na 22 pa sanang classrooms an naipapatugdok kan DPWH sa enterong Pilipinas ngunyan na taon.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan Deped-CamSur, sinaysay kaini na kadakol an pangangaipuhan kan nasyon sa classrooms orog na ta sunod-sunod an naeksperyensiyahan na linog asin bagyo.
Sa ibong kan nasambitan ng probleman, nagtutubod man an opisyal na magkakaigwa nin katupadan an mga ginigibong classroom sa bilog na Pilipinas tanganing mabawasan an agam-agam asin pagkahadit kan publiko orog na ta nahahampang an gobiero sa isyu kan katiwalian asin korupsyon.
Marurumduman, nagluwas sa pagdangog kan Senado na 22 sa labi 1,000 target na classrooms an natapos ngunyan na taon.
Mientrastanto, naglalaom man si Pelingon na gabos na naka-alokar na classrooms sa Camarines Sur an naipautob asin mayong magbungkaras na isyu kan korupsyon orog na kaipuhan ini kan mga estudyante asin paratukdo sa presente.
Sa ngunyan, pigsierto na sana kan opisyal na padagos an saindang pagbilog nin mga programa na makakatabang sa sektor kan edukasyon partikular sa mga kaakian.
