Pigsierto kan Samahan nin mga Magbabangus sa Pangasinan (SAMAPA) na magdadanay na sapat an suplay nin bangus sa probinsya sagkod sa bulan nin Disyembre.
Segun ki SAMAPA President Christopher Aldo Sibayan, an presyo kan bangus sa presente nagkakawat sa P170 sagkod P180 kada kilo, depende sa kadakulaan, gabat, asin bilang kan binabakal.
Ipinaliwanag kan opisyal na mas hababa an presyo sa Maynila huli sa kadakol na ani hale sa Bulacan asin Laguna na igwang mas hababang production cost.
Piglalaoman na magpapantay man an presyo pagkatapos kan harvest season sa ibang probinsya mantang medyo naglalangkaw an demand ngunyan na Undas huli sa mga bakasyonista.
Padagos man an mahiwas na distribusyon kan SAMAPA sa manlaen-laen na parte kan nasyon kaiba an Navotas, Malabon, asin Cagayan Region.
Tinatantya na kabanga kan kabilugan na ani sa Pangasinan an ipinapadara sa luwas kan probinsya mantang an natatadang kabanga inilaan para sa lokal na merkado.
