Aram baya nindo mga ka-bombo sarong atraksyong ropeless bungee jumping gikan sa pinakahalangkaw na tulay sa kinaban an pigsunpender antes pa man ini pormal na buksan makalihis an magkuriyat sa social media an mga video kan safety tests na nagkawsa nin takot sa publiko.
Makalihis magin tampok sa mga bareta komo pinakahalangkaw na tulay sa kinaban liwat napag-ulayan an Huajiang Grand Canyon Bridge, sa pagkakataong ini huli sa sarong kontrobersyal na atraksyon na hinahamon an mga daredevils na maglukso gikan sa tulay pasiring sa sarong rainbow-colored na lambat tanganing malikayan mahulog sa Beipan River na igwang rarom na 625 metro (2,051 talampakan).
An kua kan mga staff na nagbabagsak an mga sandbag na igwang manlaen-laen na gabat sa lambat komo parte kan safety testing an nagin viral sa mga Chinese social networks ngunyan na bulan, na nagkawsa nin takot sa publiko.
An ropeless bungee jumping naiiba sa tradisyunal na bungee jumping huli ta dae nagagamit nin safety rope an mga partisipante asin diretsong naglulukso puon sa platform pasiring sa lambat sa ibaba.
Nagtatangro an Huajiang Bridge nin manlaen-laen na langkaw puon 20 hasta 50 metro, na nagtatao nin opsyon sa mga partisipante na magpili basado sa saindang kamawotan asin kusog boot.
An presyo pigkakarkulong lampas sa 1,600 yuan ($225), mas hababa kaysa sa 3,000 yuan ($420) para sa kadalasang bungee jumping.
Nakatalaan buksan sa publiko ngunyan na semana, pigpurbaran an pasilidad gamit an mga sandbag na igwang gabat na 100 at 200 pounds na pigbagsak puon sa platform, asin kinaya man soboot kan lambat an impact, alagad dakol pa man an mga netizens na naghahapot kun ano an mangyayari enkaso dae magtama an sarong tao sa 160-square-meter na lambat, o enkaso maraot huli sa gabat kan tawo.
Komo kasimabagb sa mga batikos, pigpaliwanag kan kumpanyang nagpapadalagan kan kontrobersyal na atraksyon na an lambat dinisenyo na igwang mga fixed corners tanganing epektibong masalo an impact kan pagbagsak, asin pagkatapos mababa ini sa sarong platform sa ibaba tanganing masierto asin salbado an pagluwas kan mga tawo.
Mientrastanto, sa ibong kan pagpapaliwanag kan kompanya dae ini nagin bastante tanganing mawara an kahaditan kan publiko.
