Liwat na nakapagrehistro nin tolong sararadit na pagsabog an Taal Volcano ngunyan na aldaw, Oktubre 26, 2025, sigun sa Philippine Institute of Volcanology and Seismology (Phivolcs).
Basado sa ahensiya naikurit an enot na phreatic eruption kasubagong alas-2:55 nin mag-umagahon.
Pigsunodan ini kan duwang phreatomagmatic eruptions bandang alas-8:13 asin 8:20 nin aga.
An naeksperyensiyahang phreatomagmatic eruptions an dara soboot kan pagsabatan kan magma asin tubig sa bunganga kan bulkan, mantang an phreatic eruption an rason kan steam explosion kun pinainit kan magma an daga o tubig sa ibabaw kan bunganga kaini.
Naobserbaran man kan IP asin thermal cameras kan Phivolcs an pagluwas kan darakulang abo na nag-abot sa 1,2000 hasta 2,100 metro puon gikan sa ibabaw kan cater kan bulkan.
Mientrastanto nagtitinir man na nasa Alert Level 1 an Taal Volcano kun saen mahigot na ipinagbabawl an paglaog sa Permanent Danger Zone (PDZ) kan Isla, pagbo-boat sa lawa, asin paglupad kan eroplano harani sa bulkan.
Nagpatanid man an ahensiya kan posibleng steam-driven o phreatic explosions; mga pagyugo-yugo; minor ashfall; asin an nakagadan na gas gikan sa ibinugang abo kan bulkan.
Marurumdumang na kan nakalihis na Sabado, Oktubre 25, nagkaigwa man nin minor phreatomagmatic eruption an Taal na naghaloy nin tolong minuto, kasabay kan 9 volcanic earthquakes asin 436 toneladang sulfur dioxide emission.
