Nagpahiling nin panibagong paghiro an Bulkang Taal matapos na makapagrehistro nin duwang sunod-sunod na phreatic eruption asin paglangkaw kan bilang nin volcanic earthquake sa laog nin 24 oras, susog sa report kan Philippine Institute of Volcanology and Seismology (PHIVOLCS) ngunyan na Lunes, Oktubre 19, 2026.
Sa ipinaluwas na bulletin kan PHIVOLCS, an mga steam-driven eruption o lokal na inaapod na “pusngat” nangyari kan banggi nin Linggo, Oktubre 18, bandang alas-7:31 asin alas-7:36 kun sain nagpaluwas ini nin aso na naglangkaw nin 300 metro sa ibabaw kan main crater lake.
Apwera sa duwang minutong pagluwas kan mga phreatic eruption, nakarehistro man an PHIVOLCS nin 43 volcanic earthquake, an pinakahalangkaw na nairehistro sa laog nin sarong aldaw ngunyan na bulan, pati na man an 10 serye nin volcanic tremor na naghaloy nin sagkod apat na minuto.
Sa ibong kan mga nairehistrong paglinog asin pagbuga nin aso, magdadanay sa Alert Level 1 an Bulkang Taal na boot sabihon nasa hababang lebel ini nin unrest, alagad nagpatanid an mga awtoridad na nagdadanay pa man giraray an peligro nin biglaang pagtuga.
Liwat na pinagiromdom kan PHIVOLCS na mahigot pa man giraray na ipinagbabawal an paglaog sa Taal Volcano Island, an paglayag sa Taal Lake, asin an pagpalupad nin ano man na sasakyang panghimpapawid harani sa tuktok kan bulkan.
