Ipinagsugo ni Presidente Ferdinand R. Marcos Jr. sa gabos na may katungdan na ahensya kan gobyerno na ipautob an “catch-up plan” tanganing maparikas an pagtugdok kan mga klasrum sa bilog na nasyon.
Ini makalihis na mabaretaan na 22 sana an nakompleto sa 1,700 target na klasrums sa taon na ini. Sinaysay ni Presidential Communications Office Undersecretary asin Palace Press Officer Claire Castro, na ipinagsugo kan Presidente an tolos na resolusyon kan pagkauktaba kan konstruksyon tanganing masierto na maaabot kan mga ahensya an saindang target sa tamang oras.
Dugang pa ni Castro na pahihiruon man an mga lokal na gobyerno tanganing makatabang na maparikas an pagtugdok kan mga eskwelahan.
Sinaysay pa ni Castro na ipinagsugo kan Presidente ki Department of Public Works and Highways (DPWH) Secretary Vince Dizon na hanapon an rason kan pagkauktaba tanganing masierto an paninimbagan. Sa report, 1,700 klasrums an target na matugdok sa 2025, alagad 22 pa sana an natatapos, segun sa DPWH.
Inihayag ini ni Dizon kan nakalihis na Senado kan pag-urulayan an P625.78-bilyong budget kan ahensya para sa 2026. Sa pagdangog kan Senate Committee on Finance, sinaysay ni Dizon na 22 pa sana an natapos, 822 an ginigibo, asin 882 an dai pa napupuonan.
Nahahadit man si Senador Bam Aquino, chairman kan Senate Committee on Basic Education, sa maluya na pagtugdok kan nasambitan Ng mga klasrums sa hampang kan dakulang kakulangan kaini sa edukasyon.
Tinukoy man kaini an presenteng classroom backlog na 146,000, asin posibleng mag abot sa 200,000 sa 2028 kun dai ini maaaksyunan. Pigsuhestyon ni Aquino na itao an pondo sa mga lokal na gobyerno tanganing sinda na an magtugdok kan mga klasrums sa saindang lugar.
Obheto kan propwestong Classroom-Building Acceleration Program na pahewason an mandato sa luwas kan DPWH, asin ibali an mga LGUs asin NGOs na may track record sa konstruksyon.
Nagpahayag man nin pagkabahala an Department of Education (DepEd) sa maluya na konstruksyon. Nilinaw man kan DepEd na mayong pagkaantala sa SARO o (Special Allotment Release Order), alagad inabot nin lima hasta anom na bulan antes na maipasa.
Bagaman 22 pa sana an natatapos sa taon na ini, pigtawan duon kan DepEd na poon Hulyo 2022 hasta Hulyo 2025, nakatugdok na nin 22,092 classrooms sa bilog na nasyon, asin naibaba an backlog poon 165,443 sa 146,708.
Tanganing maparikas an pagtugdok, pigbubusol kan DepEd an flexibility sa 2026 budget tangani tugutan an pagtugdok kan classrooms bako sana kan DPWH, kundi pati kan DepEd, LGUs, AFP engineering brigades, asin sa paagi kan PPPs.
Inanunsyar man kan DepEd an duwang inisyatibo para sa transparency: Paglulunsar kan online classroom dashboard para sa public tracking asin Classroom Summit sa Nobyembre 20 para sa mas matibay na koordinasyon
