NAGA CITY- Padagos an pagpepreparar kan lokal na gobierno kan Buhi enkaso magkaigwa nin makusog na pagyugo-yugo sa saindang lugar.
Sa entrevista kan Bombo Radyo Naga ki Carmelita Marquez, pamayo kan MDRRMO-Buhi, sinaysay kaini na napapanahon an usapin dapit sa mga preparasyon kan publiko enkaso magtama an makusog na linog.
Ini makalihis an sunod-sunod na nairehistrong pagyugo-yugo sa nagkapirang lugar sa nasyon na kun saen an mga nagkapira digde an nagsapo nin labing danyos.
Sigun sa opisyal, kaipuhan na magpreparar sa paagi kan pagkundusir nin mga earthquake drill asin iba pan na klase kan lakdang na makakatabang enkaso igwang magbungkaras na kalamidad.
Katakod digde, pigsaysay ni Marquez na quarterly an saindang pagkundusir nin simulation exercises siring kan earthquake drill tanganing ipreparar an publiko sa linog asin iba pang sakuna na posibleng maeksperyensiyahan.
An nasambitan ng simulation exercises, makakatabang tanganing magkaigwa nin ideya an publiko sa kun ano an gigibuhon antes, sa kasagsagan asin makalihis an kalamidad.
Mientrastanto, apwera sa bara-barangay, nagsasagibo man sinda nin simulation exercises sa mga eskwelahan tanganing tabangan an mga estudyante asin paratukdo na magin alerto sa panahon kan emerhensiya.
Sa ngunyan, hagad na sana kan opisyal an pakikipagtabangan kan publiko para sa mas salbadong komunidad.
