Piglalaoman na magigin mas matatag an suplay nin kuryente sa nasyon sa paagi kan pagpakusog kan sadiring ginikanan nin natural gas.
Ini an pigtawan-duon ni Presidente Ferdinand Marcos Jr. sa seremonya kan inot na pagpabulos nin natural gas hale sa Malampaya Phase 4 sa Batangas City.
Segun sa presidente, makakatabang an dugang na suplay nin natural gas tanganing mabawasan an pagdepende kan Pilipinas sa inaangkat na enerhiya na apektado kan pagbabago nin presyo sa pankinaban na merkado.
Importante suboot an pagpauswag kan sadiring ginikanan nin enerhiya huli labi sa kabanga kan suplay nin enerhiya kan nasyon kan nakaaging taon an naghale sa ibang nasyon.
Sa paagi kan Malampaya Phase 4, inaasahan na madudugangan nin 222 billion cubic feet an makukua pang reserba nin natural gas kan nasyon.
Tinatayang katumbas ini kan 31.46 bilyong kilowatt-hours na kuryente, na supisyente para sa pangangaipo kan labi sa 13 milyong kabahayan sa laog nin sarong taon.
Piglalaoman man na mapapahalaba nin poco mas o menos na 6 na taon an operasyon kan Malampaya huli sa duwang bagong balon nin natural gas.
