Nangapudan si Senator Sherwin Gatchalian sa National Telecommunications Commission (NTC) asin sa Department of Information and Communications Technology (DICT) na tugison an talamak na bentahan kan pre-registered SIM cards mantang paparani an holiday season.
Nagpatanid an senador na an bentahan kan pre-registered SIM cards an ginagamit sa financial crimes asin online scams tangani makapambiktima nin mga kababayan ngunyan na mapasko.
Pig-inkaminar ni Gatchalian an NTC asin DICT na gamiton an gabos kan kapangyarihan kaini tangani obligaron an mga telecommunication company o telcos na magkriar nin mekanismo na matukoy sa mga subscriber.
Pighurot kan lehislador na kaipuhang magkriar nin solusyon huli ta igwa nin ley na laban digde na SIM Registration Act.
Pigtatawan duon ni Gatchalian na dapat wakasan na an siring na modus orog na ngunyan na mapasko asin dae na dapat pabayaang maipagpadagos pa an mga pambibiktima sa mga kababayan.
