NAGA CITY- Nagpa-abot nin udok sa boot na pasasalamat an lokal na gobierno kan siyudad nin Naga sa pamamayo ni Naga City Mayor Leni Robredo sa paagi kan CDRRMO Naga sa gabos na mga nagtarabang tanganing magin salbado an gabos sa panlalamasa ni Super Typhoon Uwan.
Partikular na pinasalamatan kan LGU-Naga an gabos na mga ahensiya, organisasyon, asin mga volunteers na solido an paghiro antes, sa kasagsagan asin makalihis an nasambitan ng Bagyo.
Puon ini sa pagpreparar asin pag-activate kan Emergency Operations Center hasta sa clearing operations, nagin importante soboot na sandalan an kolektibong paghiro sa pagsierto kan kasalbaduhan asin karahayan kan mga taga siyudad nin Naga.
Marurumduman, maogmang pigreport kan CDRRMO Naga na mayong nairehistrong binawian nin buhay sa siyudad nin Naga makalihis an panlalamasa ni Bagyong Uwan siringman tolos na nagkundusir nin clearing operations sa mga areas na apektado partikular sa kasentruhan.
Sigun sa ahensiya an ipinahiling na espiritu nin bayanihan asin paglaban kan gabos na nagtabang an tunay na nagpapahiling kan kusog asin pagkaburonyog kan bilog na Naga City.
Sa ngunyan, hagad na sana kan LGU-Naga an liwat na kooperasyon kan gabos sa panahon kan kalamidad asin pangangaipuhan.
