NAGA CITY- Nagpapadagos an pagtutok kan pamayuhan kan Caroyroyan, Pili Camarines Sur sa pagsimbag sa kaso kan mga malnourished na aki sa saindang lugar.
Sigun ki Jerry Canave, Barangay Kapitan kan nasambitan ng lugar, dae malangkaw sa 7 na kaso kan malnourished na aki an saindang nairerehistro asin 6 na stunded kada taon.
An nasambitan ng numero an maikokonsederar na minimal sana man asin nagigubuhan man nin paagi na masimbagan orog na ta naka-pokus digde an saindang Barangay Nutritionist.
Dugang pa kan opisyal, apwera sa feeding program pig-eenkaminar man ninda sa saindang mga residente na magkaigwa nin garden sa likod kan saindang harong o sa mga espasyo na pwedeng tanuman huli ta an pagpapatalubo nin gulay an makakatabang na magkaigwa nin sustansiya an pigkakakan kan mga kaakian asin mabawasan an mga malnourished na aki.
Siringman, mas nakakatipid an publiko sa pagbakal nin mga gulay orog na ngunyan na haralangkaw an presyo kaini.
Mientrastanto, nagpapadagos man sa nasambitan ng barangay an inaapod na Free dengue assessment kun saen pigtutulod an dengue awareness siringman an pagmantinir kan kalinigan kan lugar sa paagi kan pagrabos asin iba pa.
An mga lakdang na ini an makakatabang tanganing malikayan an kaso kan dengue sa saindang area asin dae na paggikanan pa kan dakulang problema.
Sa ngunyan, pigsierto na sana kan opisyal na padagos an saindang pagbilog nin mga programa na makakatabang sa saindang mga nasasakupan.
