Pigpapalikay kan Cybercrime Investigation and Coordinating Center (CICC) an mga online shopper ngunyan na holiday season huli sa piglalaomang pananamantala kan mga scammer.
Paliwanag ni CICC Undersecretary Renato “Aboy” Paraiso, malimit na samantalahon kan mga scammer an e-commerce platforms huli ta mas marekas na makumbinsi an mga parabakal digde.
Kaibahan sa mga piggagamit kan mga ini iyo an mga darakulang discount, baratong presyo kumparar sa mga igwang physical stores, asin mga pekeng testimonya.
Abiso ni Paraiso, kun mabakal man online, dapat iyo sa mga legitimate online shopping apps sana mag-order huli ta an mga ini an igwang security feature kun saen hasta bako pang marhay o makumpleto an transaction, mayo pang payment o bayadang mangyayari.
Pigsierto man soboot kan mga legitimate stores na marhay an kalidad kan saindang mga pigpapadarang produkto, kaya nalilikayan an ga fake delivery scam.
Apwera sa mga shopper, pigbibiktima man soboot kan mga fake online stores an mga delivery rider na sindang naghahatod nin mga pigpapabakal na produkto.
Pighalimbawa ni Paraiso an mga report na naguno kan CICC kun saen pigpapabayad muna kan mga online store sa delivery drivers an saindang ide-deliver na item, orog na kun an presyo an mas hababa sa P1,000.
Kadakol soboot sa mga store na naggigibo sa siring na sistema an peke an saindang pigpapa-deliver kaya kun dae na mabayad an mga shopper, an mga rider na an nalulugi.
Apelar ni Paraiso sa mga shopper, magin maingat sa pagpili nin online stores asin dae tulos magtubod sa mga tangro na discount, hababang presyo, magagayon na testimonya, asin iba pang piggagamit tanganing maka-enkaminar nin kadakol na buyers.
