NAGA CITY- Pigpaliwanag kan sarong Comelec Officer sa siyudad nin Naga an dapit sa nagin desisyon kan Commission on Elections na nagsasabing mayong pagbalgar si Senador Francis “Chiz” Escudero sa Omnibus Election Code sa saiyang pagreseber nin P30-milyong campaign donation gikan ki Lawrence Lubiano, presidente kan Centerways Construction and Development Inc.
Sa entrevista kan Bombo Radyo Naga ki Atty. Maico Julia, Election Officer kan Comelec-Naga, sinaysay kaini na kun pagbabasehan soboot an nagin desisyon kan Political Finance and Affairs Department (PFAD) kan Comelec nagluluwas na kulang sa ebidensiya an kaso na pigsunad kontra ki Escudero.
Nagluluwas kaya sa imbestigasyon na an P30-milyong campaign donation na gikan ki Lubiano an hali sa personal na kapasidad kaini bakong sa kompanya.
Boot sabihon mayong pagbalghar sa nag-iiral na ley o sa Omnibus Election Code.
Alagad sa ibong kan nagin desisyon kan Comelec, dae man mahali sa publiko na mag-isip na posibleng maimpluwensiyahan o mapaburan si Lubiano sa mga mawot kaining laugan nin kontrata huli sa saiyang donasyon.
Marurumduman, nagpuon an kaso makalihis akuon ni Escudero na nagreseber ini nin P30-milyong campaign donation gikan ki Lubiano, na presidente kan Centerways Construction—saro sa top 15 government contractors na tinukoy ni Presidente Ferdinand Marcos Jr. na nakakua nin pinakadakol na kontrata para sa flood control projects sa bilog na nasyon.
Sa ngunyan, kun mawot soboot na mapanimbag si Escudero asin dae sinda uyon sa nagin desisyon kan Comelec pwede an mga ining magpasiring sa Ombusdman asin magsangat nin reklamo.
