Target kan Senado na puonan an period of amendments o pag-amyendar sa propwestong pambansang pondo para sa 2026 sa masunod na semana.
Sa entrevista, inihayag ni Senate Committee on Finance Chairman Senador Sherwin Gatchalian na nagkaigwa nin kadikit na pagbabago sa schedule kaya man sa Lunes, December 1, na sana pupuonan an pag-amyendar sa propwestong budget.
Paliwanag kan senador, kadakol na mga lehislador asin mga ahensya kan gobyerno an padagos na nagsusumiter kan saindang mga amendment kaya kinaipuhang baguhon an iskedyul.
Mientrastanto, target ngunyyan na aldaw na tapuson an period of interpellation o debate sa budget kan mga ahensya kan gobyerno. Target man kan Senado na maaprubaran an budget sa second reading sa December 3 asin sa third reading sa December 9.
Enot nang sinaysay ni Senate President Vicente Sotto III na dae sesertipikaran komo urgent bill ni Presidente Ferdinand Marcos Jr. an propwestong 2026 national budget.
Sa urulay kan bicameral conference committee para sa 2026 national budget, target kan Senado na maisagibo ini ngunyan na ikaduwang semana kan Disyembre.
Sigun ki Gatchalian, nagtagama sinda nin limang aldaw para sa bicam deliberations, alagad pwede pa ining mabawasan kun aakuon kan Mababang Kapulungan an bersyon kan Senado.
Presente na man na pigpreparar an livestreaming kan bicameral meetings tangani masierto an transparency sa proseso.
Pigheras man ni Gatchalian na nagpuon na an koordinasyon sa pag-ultanan kan Legislative Budget Research and Monitoring Office (LBRMO), Senate Committee on Finance, asin Committee on Appropriations kan Kamara.
May napili na man soboot na venue sa sarong pasilidad sa Intramuros, na inako man kan House panel komo lugar kan pagsasagibo nin bicam.
