Preparado na an pambato kan Pilipinas, si Miss Charm Philippines 2025 Cyrille Payumo, para sa ikukundusir na Miss Charm International pageant sa Vietnam sa maabot na Disyembre 13, 2025.
Si Cyrille nagbali sa Miss Universe Philippines 2024 kun saen ini an pigkoronahan komo Miss Charm Philippines 2025. Saro ini sa beteranang beauty queen na marurumdumang nagin Mutya ng Pilipinas 2019 first runner-up asin Miss Tourism International 2019.
An mga eksperyensiyang ini an nagpatibay sa saiyang adbokasiya para sa pagpreserba kan kultura asin hanapbuhay kan mga komunidad kan Aeta sa Porac, Pampanga, sarong lakdang na nakakatabang sa pagpapapusog kan kaaramang kultural asin pag-uswag kan komunidad.
Mientrastanto, pighayag ni Cyrille na ini an padagos naglakaban sa Polycystic Ovary Syndrome (PCOS). Aminado ini dae nagin madali an laban, kaya nangapudan ini na an kaipuhan kan mga kababaihang may PCOS bakong panghuhusga o body shaming, kundi pag-intindi, empatiya, asin suporta.
Sa ibong kan saiyang pinagaagihan, napansin kan pageant fans na mas orog pang nagigin glowing si Cyrille ngunyan. Naglalaom an netizens na maipuli kaini an kaenot-enoteng Miss Charm crown para sa Pilipinas.
