NAGA CITY- Puspusan an preparasyon na pigsasagibo kan BFP-Nabua para sa papaabuton na kapaskuhan.
Sa entrevista kan Bombo Radyo Naga ki FINSP Jonathan Jaurigue, Acting Municipal Fire Marshal kan BFP-Nabua, sinaysay kaini na apwera sa regular na inspeksyon kan mga edificio sa saindang banwaan magkakaigwa man soboot sinda nin pagbabandilyo.
Obheto kaini na matawan nin bastanteng impormasyon an publiko sa kun ano an mga dapat rumdumon tuyong kapaskuhan orog na ta kadakol an nagbabakasyon sa panahon na ini.
Kabali sa mga abiso na saindang piglalatag iyo an pag double check kan mga nakasaksak na appliances, pagkandado kan mga pintuan, igwang naka-antabay na fire supression na magagamit sa panahon kan emerhensiya.
Mientrastanto, nakatalaan man na mag-inspect an nasambitan ng opisina sa mga paputok na ipapabalal asin hihilingon kun nagsusunod sa mga reglamentos an mga vendors.
Dugang pa ni Jaurigue, malibot an saindang mga personahe uru-aldaw sa saindang banwaan tanganing maasegurar an kasalbaduhan kan publiko.
Katakod kaini, mayo man soboot problema sa mga personahe orog na ta pwedeng maghugot sa mga naka-off duty asin iga man sindang pigtutukduan na mga OJT’s.
Sa ngunyan, hagad na sana kan opisyal an kooperasyon kan saindang mga residente para sa salbadong pagselebrar kan Holiday season.
