Mahigot na mga mekanismo an ipapautob kan Department of Social Welfare and Development (DSWD) tanganing malikayan an korapsyon sa paghahatod nin serbisyo.
Ini an pigtawan duon ni DSWD Secretary Rex Gatchalian sa tahaw kan mga imbestigasyon katakod kan flood control projects.
Susog ini sa direktiba ni Presidente Ferdinand “Bongbong” Marcos Jr. na enoton an serbisyo para sa mga tios asin vulnerable sector.
Kaibahan sa mga papahigoton na lakdang an direktang pagpadara kan cash aid sa mga digital wallet kan mga benepisyaryo, partikular sa Pantawid Pamilyang Pilipino Program (4Ps), tanganing malikayan an lump sum distribution asin potensyal na katiwalian.
Nag-aagi man sa assessment kan mga social worker sa case management system an kada aplikasyon antes magtao nin tabang, komo importanteng safety net kontra sa iregularidad.
Dugang pa kaini, kaiba sa mga reporma an automation process tanganing mabawasan an human intervention asin maparekas an pagluwas kan mga dokumento siring kan Request for Legal Assistance (RLA) certification asin Minor Travel Abroad (MTA) permits.
Suportado man kan ahensiya an Philippine Identification System (PhilSys) enrollment kan mga 4Ps beneficiary tanganing maparekas an validation asin malikayan an ghost beneficiaries.
