NAGA CITY- Padagos an pag-enkaminar kan Comelec Caramoan sa saindang nasasakupang mga residente na magparehistro sa nagpapadagos na voter’s registration para sa 2026 Barangay asin SK Election.
Sa entrevista kan Bombo Radyo Naga ki Denniz Gomez, Election Officer III kan Caramoan, sinaysay kaini na makalihis an panlalamasa kan Bagyong Uwan matumal o kakadikit sana an mga aplikante na nagpapasiring sa saindang opisina tanganing magparehistro.
Paliwanag kan opisyal, saro an banwaan kan Caramoan sa tinamaan kan nasambitan ng bagyo na nagkawsa nin pagkadanyar sa mga kaharongan.
Huli kaini, may mga aldaw na mayong nag-aabot sa opisina kan Comelec Caramoan siringman pigkanselar an orihinal na schedule kan satellite registration.
Tanganing masimbagan an problema, nagkaigwa nin meeting an komisyon kaibahan an mga Barangay Kapitan tanganing i-finalize an update na satellite registration.
Ini an nagpuon ngunyan na aldaw, December 03, 2025 sa Guijalo.
Apwera digde, igwa man special satellite registration para sa mga kababaihan asin PWD.
Sa ngunyan, sa mga mawot soboot na magparehistro magpasiring sana sa saindang opisina aldaw nin Lunes hasta Sabado asin darahon an mga pighahagad na requirements sa pagpaparehistro.
