NAGA CITY- Pigtutugutan kan lokal na gobierno kan banwaan nin Ocampo an taga-ibang lugar na mag-apply nin pwesto sa Ocampo Public Market.
Sa entrevista kan Bombo Radyo Naga ki Eduardo S. Jallores Jr, Designated Market Administrator kan Ocampo Public Market, sinaysay kaini na pwedeng magtinda sa saindang merkado publiko an mga dayo tanganing ma-enkaminar an kompetisyon sa lugar.
Sigun pa ki Jallores, kaipuhan na buksan sa gabos an merkado publiko orog na ta medyo dikit na sana man an paratienda na gikan sa saindang banwaan.
Katakod kaini, dae man soboot malilikayan na igwang magreklamo na mga residente orog na ta dapat taga-Ocampo sana an magtinda sa saindang public market.
Alagad dae pwedeng pabayaan an kamugtakan sa merkado publiko orog na ta saro pa ini sa pigkukuanan kita kan banwaan na nagagamit sa ibang mga programa.
Paliwanag pa kan opisyal, antes man an pagpautob kan programa nagkaigwa nin meeting asin warning sa mga taga-Ocampo tanganing dae man mabigla an iba.
Mientrastanto, nairehistro man an kadikit na paglangkaw sa mga barakalon sa public market kan Ocampo alagad ini an maikokonsederar na normal sana man.
